• Главная
  • Артисты
  • Люди театра
  • История
  • Билеты
  • Пресса
  • Отзывы
  • Контакты
  • Министерство культуры и национальной политики Республики Мордовия
    Касса театра: 38-07-03
    Администраторы: 47-25-33
    Репертуар Афиша План работы Наши достижения Гастрольно - выездная деятельность Оценка качества Документы

    «АРТИСТТИ ИНЬ ЦЕБЯРЬ КАЗНЕСЬ—ВАНЫХНЕНЬ КЯДЕНЬ ЦЯПАМАСНА»,- мярьгсь Мордовия Республикань лауреатсь, Мордовиянь Заслуженнай артистсь, Мордовиянь Народнай артистсь В.Н.ГУДОЖНИКОВ

    Кизостакизос миньцонк касы театрань кельгихнень лувкссна. Пяшксе зрительнай залхне корхтайхть сянь колга, што артистоньке талант мархтот. Мордовскяй национальнай драматическяй театрань фкя тяфтама «тяштть» мокшалять Виктор Николаевич Гудожниковонь мархта васьфнесь минь корреспондентоньке и эняльдсь отвечамс кизефксонзон лангс.
    —Виктор Николаевич, кода арамс афкуксонь артистокс? Мезьста ушеткшнеть тон?
    —Шачень-касонь Зубово-Полянскяй райононь Сире Байдеку мокшень велеса. Тостонь школаса тонафнемста примсень участия сембе утренникнень эса. Тоса ульсь ялгазе Василий Кудряшов, кона сашендсь каникулас велезонк бабанц пяли. Ладяме мархтонза и од ломанень келеса тиендеме концертт велень клубса. Аноклакшнеме мялень салай программа. Мон, кепотьксонди, морань и примсень участия сценкатнень эса. Тяфта ушедонь кель-гомонза сценать.
    —Кода эряфсь велень клубонь и школань сценанять лангста пачфтензе театрань оцю сцена лангс?
    —1966 кизоня, мзярда тонафнень 10 класса, Зубуса етась райононь велень клубонь художественнай самодеятельностень смотра, коза сашендсть представительхть Саранскяйста. Выступленияньконь ваномда меле жюринь члеттне тердемазь монь тонафнема Мордовскяй АССР-нь Государственнай музыкальнай драматическяй театральнай студияв. Тонафнень тоса колма кизот. Васенце курсса мон, кода и лия тонафни ялгане, мезевок ашень шарьхкоде. Омбоце курсса ушедоме лисендема сцена лангс. Но улеме аньцек массовкаса, кона эрявкстсь оперань и драмань няфтемста. А вов колмоце курсса тейнек ушедсть макссема аф оцю эпизодическяй рольхть. Театральнай студиять шумордамдонза меле ушедонь работама Мордовиянь Государственнай музыкальнай драматическяй театраса. А сяльде, кафта кизода меле, сявомазь армияв служама.
    —Кода мольсь службаце? Ульсь-аш кода пингстонза няфтемс асушицень?
    —Фкя киза мон служань Казахстанонь Семипалатинскяйса, омбоцеть— Тула ошса. И тяса, и тоса заняфолень художественнай самодеятельностьса. Примсень участия илатнень, пуромкснень, концерттнень эса. Кочксень солдаттнень еткста асу ломатть, штоба тиендемс цебярь концертт. Тяфта и апак шарьхкотть етасть службань кафта кизотне.
    —Кода ладявсь эряфце армияда меле?
    —Армияда меле мрдань меки музыкальнай драматическяй театрав, коса работань 1990 кизоть самс. Эста панжевсь Национальнай драматическяй театрась. Артисттне ушедсть срадома кие коза. Мон тунь од театрав, коса работан тянемс.
    —Азонтт, пожалуйста, спектакльхнень колга, конатнень эса налхкоть.
    —Сембода мяляфтовикс тейне арасть А.И.Пудинонь «Шава кудса ломатть», В.И.Мишанинать «Кда орта лангса суви пине», К.Г.Абрамовонь «Эрь ломанть сонцень урмац» произведенияснон лангс путф постановкатне. Рольда пяк ламоль. Ламотне, пади, лятфтасазь Лотор атянь, кона азонкшнесь пеетькст «Сияжар» передачаса. Тяни аноклатама В.М.Шукшинонь «Крыша поехала» азксонц коряс спектакльти, конань няфтьсаськ ваныхненди 19 апрельста.
    —Кодама мяльса-арьсемаса лисендят сцена лангс?
    —Хуш 40-да лама киза работан театраса, сякокс, эрь выступлениять карша трнатан. Но етай мзярошка минута и мон юкснесайне сембе таколдоманень и анокан кеняртьфтемс ваныхнень. А мзярда спектакльсь шумордави, зрительхнень кядень цяпамасна арсихть тейне питнидонга питни казнекс.
    —Спасиба.

    И. Пятина (Газета "Мокшень правда", 3 апреля 2014, стр.7)