• Главная
  • Артисты
  • Люди театра
  • История
  • Билеты
  • Пресса
  • Отзывы
  • Контакты
  • Министерство культуры и национальной политики Республики Мордовия
    Касса театра: 38-07-03
    Администраторы: 47-25-33
    Репертуар Афиша План работы Наши достижения Гастрольно - выездная деятельность Оценка качества Документы

    ТЕАТРАНЬ РАСЬКЕЮТКОНЬ ЧИ

     

    Мартонь 27-це чистэ минек республикасо тешкставсь Театрань чись. Тень кувалма Национальной драмань театрасо ютась кенярксчи. Вейс пурнавкшность Саранскоень весе театратне. Сынст туртов паро валонь ёвтамо сакшнось МР-нь Культурань ды туризмань министрась В.И.Шарапов. Сон истя жо лембе поздоровт пачтясь МР-нь Прявтонть В.Д.Волковонь пельде. Министранть валонзо коряс, театрась эйсэнек тонавты, кази паро ёжо, валдо мельть-арсемат.

    – Теевсь паро коекс эрьва ие ютавтомс «Театрань недля» фестиваленть. Сонзэ вельде минек театратне невтить эсь путовксост эрьва кодамо жанрасо. Ваныцятне содавтовить искусстванть марто. Тедеде Мордовиянь Театральной деятелень союзонтень (СТД) топодсть 80 иеть! – мерсь В.И.Шарапов.

    Теде мейле яволявтозель артисттнэнь туртов покш лемтнень максомась. Истя, «МР-нь Заслуженной артистэкс» кармасть Сергей Самарин (сон важоди рузонь драмань театрасо) ды Юнир Халиков (някань театрань артист). Артисттнэ казевсть Почётонь грамотасо ды Благодарностьсэ. Казезетнень ютксо театрань лия важодицятнеяк.

    Истя жо яволявтовсть тетральной искусствасо МР-нь Прявтонь премиянь лауреаттнэ. Сынст лемест ёвтамо сцена лангс тердевсть спектаклянь ваныцятне. «Сехте вадря режиссуракс» кармась Андрей Ермолинэнь «У войны не женское лицо» спектаклясь (рузонь драмань театрась). «Авань сехте вадря роль» номинациясонть 5 изницят! Весе сынь налксить самай А.Ермолинэнь путовкссонть. «Цёрань сехте вадря роль» номинациясонть киньгак эзть кочка, тень коряс цёратне-артисттнэ, нама, апаркстомсть. «Омбоце планонь сехте вадря роль» пелькссэнть изнясь Валентина Ермошкина (нацтеатрасто) ды Алексей Тимин (рузонь драмань театрасто). Изницятнень ютксо истя жо музыкань театрань, някань театрань артисттнэ. Интернет-кочкамонь коряс ломантне сехте ламо вайгельть макссть «Крошка» кинонь ды театрань центрань «Выходили бабки замуж» путовксонть кисэ. Те спектаклянть режиссёрось Оксана Постевка казезель «Сехте вадря сценографиянть кисэ».

    Ламо премият ульнесть СТД-нть пельде. Сонзэ прявтсо ней Николай Большаков. Казевсть театрань ветерантнэяк. Те чокшнесь ютась лембестэ, пейдемань лувсо, гайгсть ламо морот. Икелепелев театратне тагояк арсить, мейсэ кецявтомс ваныцяст.

    Кодат кулятне Национальной драмань театрасо? Мартонь 15-18-це читнестэ артисттнэ якась гастролев Татарстанов. Альметьевск ошсо невтезельть Лопе де Вегань «Чудеса пренебрежения, или Женщины – это дьяволы», В.Шукшинэнь «Латось сыргась» спектаклятне. Вишка ваныцятнень туртов – В.Илюховонь «Как Баба Яга дочек замуж отдавала» музыкальной ёвксось.

    Лия ошсо спектаклянь невтематне, ваныцятнень марто вастовоматне кандыть кеняркс, максыть вийть. Кувака кинть лангс апак вано, артисттнэ сыть тосто паро ёжосо. 

    Аволь умок театрасонть ульнесь премьера. Тесэ путызь Ю.Кимень «Кто принцессу поцелует» (путыцясь Л.Шахова) ёвксонть. Эйдетне ды покштнеяк вастызь сонзэ мельспаросо. Маласо шкасто тесэ путыть од спектакля. Те – М.Ладонь произведениянзо коряс «Очень простая история» (путыцясь Ю.Хвостиков). Репетициятне ушодовсть.

    Кода ютась актёртнэнь туртов театрань меельце иесь? Теде ёвтни Нина Абросимова:

    – Меельце шкастонть мон налксян Н.Гоголень «Урьвакстома» спектаклясонть Арина Пантелеймоновнань (те главной героинянть патязо). Зярдо лисинь сцена лангс – ламот арсесть, мон – одирьвась, купецень тейтересь, конань максовлизь мирденень, – пейди Нина Абросимова. – Ролесь сельмс каявиця, монень тукшны мельс. Сюкпря режиссёронтень, саимим налксеме. Истя жо налксян К.Абрамовонь «Эрьванть эсензэ ормазо» путовкссонть. Тосо мон служавтовлия кулозь мирдем. Сынь шабра велев попонь вешнеме ды понгсь килангозон Кальдиркин-манчицясь. Ролесь вишкине, ялатеке удалась пейдевтемс ваныцятнень. Свал кецян, зярдо савкшны налксемс комедиянь образт. Те монь коряс. Бажан налксемс кодамояк спектаклясо главной роль, улезэ те путовксось комедиянь. Ансяк вана арась минек эсенек режиссёронок. Те ризнэвти весе театранть».

    Нина Абросимова чачсь Покш Игнатбуень Од Кшуманця велесэ. 1985 иестэ семиянек састь эрямо Саранскоев. Нина тонавтнесь Казанень культурань государственной институтсо. Кизна топодить 25 иеть, кода важоди Национальной театрасо. Те шканть перть налксесь малав 20 эрьва кодат рольть. Театрань искусствас покш путовксонть кисэ казезь ламо Почётонь Грамотасо ды Благодарностьсэ.
    «Эрзянь правда» газетань коллективесь Раськеютконь театрань чинть кувалма арси МР-нь Национальной драмань театрань артисттнэнь туртов кеме шумбрачи, паро рольть, ваныцятнень пельде ламо цецят!

    Т.МАТОРКИНА