• Главная
  • Артисты
  • Люди театра
  • История
  • Билеты
  • Пресса
  • Отзывы
  • Контакты
  • Министерство культуры и национальной политики Республики Мордовия
    Касса театра: 38-07-03
    Администраторы: 47-25-33
    Репертуар Афиша План работы Наши достижения Гастрольно - выездная деятельность Оценка качества Документы

    ЭРЗЯНЬ ДЫ МОКШОНЬ ТЕАТРАСЬ УЧИ ИНЖЕТЬ

    Эрзянь ды мокшонь национальной драмань театрасо од сезонось панжови октябрянь 14-це чистэ. Ваныцятнень туртов невтеви М.Ладонь пьесанзо коряс «Очень простая история» спектаклясь. Сонзэ путыцязо – Казахстанонь заслуженной артистэсь Ю.М.Хвостиков. Сон карми мокшонь кельсэ. Спектаклянь репетициятне ушодовсть тунда. 

    Октябрянь 19-23-це читнестэ минек артисттнэ сыргить гастролев. Сынст эйсэ учить Тамбов ёнксонь Мичуринск ошонь рузонь драмтеатрасо. Тостонь театрась сы миненек, невти спектаклят Саранскойсэ. Лиякс меремс, те – полавтомань гастрольть. Аволь умок тей сакшнось Мичуринскоень драмтеатрань прявтось, РФ-нь культурань заслуженной роботникесь Г.Н.Попова. Ды вана мезе сон ёвтнесь. 

    – Мичуринск ошсо эрить малав 90 тёжат ломанть. Те вейкине театра ошсонок. Сы иестэ сонензэ топодить 120 иеть. Эсь шкасто сонзэ стявтокшнызь ошонь сюпав купецтне. Театрасонть 500 таркат. Эряви меремс, ваныцядонок ламо. Минек ошсо театранть вечксызь, – ёвтни Галина Николаевна. 

    Мичуринскоень драматической театрась ардтни гастрольга эрьва кува: Россиянь оштнева ды омбо масторга (сынь ульнесть Германиясо, Польшасо, Туркменистансо). Эсь пряст невтнить раськеютконь ды весероссиянь театрань фестивальтнесэ. Колмо иень перть РФ-нь Культурань министерстванть лезксэнзэ вельде театрась ардтни полавтомань гастрольга лия ошка. Г.Н.Поповань валонзо коряс, тедеде сынь пек бажасть теевемс содавиксэкс лия раськень культуранть марто. Саемс межнациональной теманть. Истя, сынь сюлмавсть Мордовиянь Эрзянь ды мокшонь национальной театранть марто. Минек оштнень явить 450 вайгельпеть.

    – Мезес минь бажатано? Те – келейгавтомс гастролень географиянть, кемекстамс ялгаксчинь сюлмот, варштамс, кода эрить шабра раськетне, паряк, мезеяк саемс тынк пельде, паряк, тынь мезеяк сайтядо минек пельде. 

    – Галина Николаевна, инескеть, ёвтнеде театрадонк. 

    – Минек театрасо артисттнэ эрьва костонь, Россиянь эрьва кодамо ошонь. Коллективесь пурнавсь вадря. Труппасонть Россиянь 6 заслуженной артистт. Од ломантнеяк пек ёроковт. Прявт режиссёронок истя жо од ломань, сон сась Санкт-Петербургсто. 

    – Кодат спектаклят усктадо мартонк? 

    – Гастрольтнень панжсынек спектаклясонть, кона юты минек сцена лангсо кемень иень перть, ды сон ваныцятненень пек вечкеви. Те – Ю.Каплуненконь «Эдит Пиаф» спектаклясь-сагась, кона ёвтни аволь ансяк содавикс морыцянть эрямодо, истя жо тесэ гайгить ламо морот. Прявт роленть налкси актрисанок, кона аволь весть изнякшнось джазонь моронь покш конкурстнэсэ. Свал моры сонсь. Арсян, спектаклясь туи мелезэнк. 

    Теде башка, невтьсынек П.О.Бомаршень «Безумный день, или Женитьба Фигаро» путовксонть. Сонзэ эйсэ налкси весе труппась – 30 ломанть. Артисттнэ невтьсызь эсь пряст эрьва ёндо. Кармить киштеме ды морамо. Те спектаклясь ламоксть лиснесь изницякс театрань фестивальтнесэ, тешкстазельть авань ды цёрань сехте вадря рольтне. 
    Истя жо невтьсынек Л.Разумовскаянь «Медея» ды Р.Кунинь «Клинический случай» комедиятнень. Те сетнень туртов, кинь ули мелезэ оймсемс ды пейдемс. Учотано пешксе залт, цяпамот, лембе валт тынк пельде. Путсынек весе виенек, ансяк бу туемс мелезэнк. Паро мельсэ теевтяно содавиксэкс од ваныцятнень марто. Вете чинь перть невттяно 10 спектаклят покштнень ды эйкакштнень туртов. Весе садо ваномо! 

    Т.МАТОРКИНА