ВЕРСИЯ ДЛЯ СЛАБОВИДЯЩИХ
  • Главная
  • Артисты
  • Люди театра
  • История
  • Билеты
  • Пресса
  • Гостевая книга
  • Контакты
  • Министерство культуры, национальной политики и архивного дела Республики Мордовия
    Касса театра: 38-07-03
    Администраторы: 47-25-33
    Репертуар Афиша ПРОЕКТЫ Наши достижения НАЦИОНАЛЬНЫЙ ПРОЕКТ "КУЛЬТУРА"" Оценка качества условий оказания услуг Документы Программа: мы ищем тебя, волонтер! 150 лет Ф.В.Сычкову «Мечта ветерана»

    Ули надияма, курок минь васеттяма зрителеньконь мархта!

    Мордовиянь национальнай драматическяй театрать директороц С.И. Дорогайкина:
    —Светлана Ивановна, тяддень кизоть эсь лацонь ширенза содафт. Сяс ёран кизефтемс: кода латцевсть театрать тевонза пандемияда инголе, кода мольфтевихть синь пандемиять пингста и, мзярда валхтовихть ограничениятне, кодама спектакльса арьси панжемс Театральнай од сезононц Мордовиянь национальнай драматическяй театрась?
    —Мелянь  сёксеста сявомок, мзярда театрась ушедозе од театральнай сезононц, и тяниень пингти самс, мзярда театрась сёлгозе театральнай сезононц, сон эрясь творческяй козя эряфса.
    Театральнай сезонть пингста путневсть од спектакльхть, ётафневсть мялень салай премьерат, няфневсть спектакльхне кода миньцонк, стане и гастрольса, театрась якась Международнай и Всероссийскяй театральнай фестивальс, коса постановкатне арсесть лауреатокс.
    Тяфта жа эряви азомс, тейнек кучсть ни од тердемат Международнай и Всероссийскяй театральнай фестивальс «Куйгорож» и «Ромео и Джульетта» од спектакленьконь мархта, конат путфт театральнай тяддень сезонцта мокшэрзянь и  английскяй драматуркнень В.Мишанинать и У.Шекспиронь содаф произведенияснон коряс.
    Ня постановкатне тяфта жа пяк тусть Мордовиянь зрительхнень мяльс. Пандемияда инголе  миньцонк ваномс синь кенерсть тёжятть ломань. А мзярда пандемиять инкса театратненди ладяфтольхть-путфтольхть ограниченият, театраньке ушедсь  работама онлайн-форматса и интернетонь лия ресурснень вельде.
    Кепотьксонди, ёфси аф кунара театраньке ульсь театральнай онлайн-фестивальса, кона ётафтовсь Липецк ошса. Онлайн-форматса фестивалень жюрити минь няфтеськ «Капитанская дочка» спектакльть, кона путфоль А.С.Пушкинонь сембонди содаф повестенц коряс. Спектакльсь арась фестивалень лауреатокс и, тяда башка, сатозе васенце вастть «Лучшая режиссура» фестивалень номинацияса.
    Тяда башка, пандемиять ушедомда меле и тячити самс театрать сембе спектакленза зрительхненди няфневихть онлайн-форматса. Эрь ковонь ушедомда инголе онлайн-афишась путневи-лихневи театрать сайтс, а тяфта жа «ВКонтакте», «Одноклассники» сайттненди и социальнай лия сетьса. И кода няфнесы мониторингсь, зрителень лувкссь, конат ванондсазь Национальнай театрань спектакльхнень онлайн-форматса, няевиста кассь. Сяс пандемиять аделавомда мелевок театрась кармай работама онлайн-форматса. Сембе спектакленьконь ули кода ваномс «Российскяй Федерациянь Культура» порталса.
    Но, тяка пингть, эряви азомс, ня шитнень Национальнай театрась  сембе вийса аноклай театральнай од сезонть панжеманцты. Мезе тят корхта, но театрань сценать лангса няйф спектакльть, койсон, аф полафтсы кодамовок онлайн-форматсь. Сяс Национальнай театрань сембе кельгихненди, кит тячи сидеста гайфнихть тейнек телефонца и кизефнихть, мзярда театрась панчсы од сезононц,—мярьган тяфта: ялгат, минь театраса надиятама васедемс мархтонт тяддень сёксеть ушетксста.
    —Кодама од спектакльса, Светлана Ивановна, ёрай кеняртьфтемс зрителенц Мордовиянь национальнай драматическяй театрась маластонь пингть?
    —Тячи минь работатама кафта од постановкань лангса. Шарьхкотьф, ня и сембе лия тефне театраса вятевихть санитарно-эпидемиологическяй норматнень вешфксснон  мяльс сявозь.
    Васенце спектакльсь, конань Шарль Перронь «Золушка» ёфксонц коряс путсы театрань актёрсь Павел Михайлов, конешна, кармай лемтьф ёмла зрительти. Но и оцюфненьге саласыне мяльснон и кой-мезть лангса арьсефтьсыне. Сяс мес режиссёрсь путсы  «Золушкать» эсь лацонза. Спектакльса кармай лама музыкада, геройхне щафт-каряфт мазы костюмса, тифт ни ёфксонь мазыдонга мазы декорацият.
    «Саня, Ваня, с ними Римас» Владимир Гуркинонь пьесанц коряс омбоце постановкать анокласы тяфта жа минь актёроньке Андрей Анисимов. Тя спектальса, кона лемтьф Великай Победать 75 юбилеенцты, Национальнай театрась сёксенда арьси панжемс Театральнай од сезононц.
    Эряви азомс, тя спектакльть путомста, коса азондови народоньконь подвигонц колга, конань сон тиезе  войнань кизотнень, и режиссёрсь, и актёрхне, и театрань лия работникне путсть творческяй лама вий-эрьгя. Сяс театраньконь зрителенцты, кона учи, мзярда минь панчсаськ театральнай од сезононьконь, ёран  азомс, зрительти кармай мезе ваномс!
    —Кода содаф, сай кизонь апрельста странаса арьсекшневи ётафтомс Населениянь Всероссийскяй переписсь. Переписьта инголе и пингстонза мокшэрзянь народть марстонь лувксонц аф прафтоманкса, кодама работа арьси ётафтомс Мордовиянь национальнай драматическяй театрась?
    —Койсон, мокшэрзянь театрась эсь творчестванц вельде тяда инголивок и тянивок касфты-кемокстай народоньконь национальнай самосознаниянц эса. Сяс, кда валхтовихть ся пингс ограничениятне, конат ладяфт пандемиять сюнеда, театрась эсь инь цебярь спектаклянзон мархта ётафты гастрольхть Самарскяй, Ульяновскяй, Пензенскяй и странань лия субъекттнень эса, коса компактнайста эряйхть мокшэрзят.
    Тяда башка, минь виияфтсаськ работаньконь онлайн-форматса. Сяс мес аньцек  интернетонь ресурснень вельде мокшень и эрзянь  валсь и театрать творчествац ламода сяда курокста пачкодихть странань ся региоттненди, коса тяфта жа  компактнайста эряйхть мокшэрзят, но коза минь нинге ашеме повонда.
    Целеньке содаф,  кда Всероссийскяй переписть пингста эрь мокшесь и эрзясь сёрматфтсы эсь национальностенц «мордвин или мордвин-мокша и мордвин-эрзя» валса, эста, надиян, народоньконь марстонь лувксоц аф прай. И минь, мокшэрзятне, Россияса ляттама финно-угорскяй инь оцю народкс!
    —Светлана Ивановна, удалаза сембе арьсефонте.
    —Сюкпря. И мон нинге весть ёран азомс зрителеньконди: минь тяфта жа лажадоме теенть. Надиян, курок минь тага васеттяма Мордовиянь национальнай драматическяй театрать мазы залсонза. Сяс—няемозонк!

    В.Нестеров. Газета "Мокшень правда", 06.08.2020 №30

             

     

    07.08.2020 / Количество просмотров: 97