• Главная
  • Артисты
  • Люди театра
  • История
  • Билеты
  • Пресса
  • Гостевая книга
  • Контакты
  • Министерство культуры, национальной политики и архивного дела Республики Мордовия
    Касса театра: 38-07-03
    Администраторы: 47-25-33
    Репертуар Афиша ПРОЕКТЫ Наши достижения НАЦИОНАЛЬНЫЙ ПРОЕКТ "КУЛЬТУРА"" Оценка качества условий оказания услуг Документы Программа для туристов

    Раськень озкс

    Кизэкуншка. Ушосонть маней, лембе. Верде апак лотксе мизолды чипаесь. Мельганзо, теке ревень стада, якить пельтне. Сынь бажить копачамс чипаенть, кекшемс сонзэ валдонзо ды моданть лангс нолдамс пиземе. Тень теемс, теке мерят, а максы сонсь Инешкипазось. Кирди пельтнень эйсэ. Ужо, марят, илядо капша пизементь марто. Несынк, ломанть пурнавсть Пазнэнь озномо. Илядо тандавтне эйсэст. Вана прядсызь тевест, сестэ панжинк пиземень оромканк. Редязель, Раськень озксонть ютавтома шкастонть истя эрси свал. Малава таркатнева пиземесь валозь валы, а вана се кужонтень, косо 1999 иестэ саезь ютавтневи Раськень озксось, сон а пачколи. Те, келя, сонсь Пазось лезды эрзятненень пурнавкшномс вейс озномо, покштятнень-бабатнень лемест кундамо, тевдест-мелявкстост кортамо. 
    Истя ульнесь ютазь субутастояк (медьковонь 13-це чистэ). Покш Игнатбуень Чукало веленть маласо Кужолеев (те таркась кочказель астяко. Таго-зярдо тесэ мольсть покш тюремат ногаецтнэнь каршо ды маштовсть 11 тёжа ломанть) овсе пиже валскестэ саезь кармасть пуромомо ломанть. Весемеде икелев састь сеть, кинь лангс путозель мелявксось ютавтомс те покшчинть. Мартост – сыненст лездыцятне. Сынст ютксо ламотне – ве ёндо сазь ломанть: Мурманскойстэ, Красноярскойстэ, Самарасто, Пензасто ды лия таркасто. Сынь тесэть уш аволь вейке чи. Лездасть эрьва мейсэ. Но сехте покш тевесь – стявтомс Штатолонть. Те теемс а шожда. Васня эрявсь муемс зняро шта, сатоволь стявтомс кавто ломанень сэрьсэ ды зняро жо эчкесэ Штатолонть. Тевесь изнязель. Ды Раськень ютавтома чистэ Раськень Штатолось теке одирьва аштесь сехте неявома таркасо. 
    Шкастонзо печкезель букаськак, конань сывелесь эрявсь ямонь пидемс, мейсэ кармить каванямо весе инжетнень. Витезельть комсешка толпандят, конатнень лангс ладязельть ведте пештязь котёлт. Кирвазема тевенть а нолдамга ды лия зыянонь а лисемга панезель пожарноень машина. Лиякс мерезь, тевтне аволь мольсть, лаказь лакасть. 
    Вейсэнь вийсэ 
    Истя, вейсэнь вийсэ, Раськень озксонтень анокстасть седикелеяк. Сестэяк эрзятне сакшность эрьва ёндо. Ансяк марилизь Тюштянь тораманть вайгелензэ, сеске пурныльть ды сыргильть покшнек-вишкиненек. Содыльть, ков молемс. Озксонь ютавтнемс кочказельть башка таркат – репештят. Неть таркатнень мельга вансть, кирдсть эйсэст ваньксстэ, эзь мереве керямс тосто вейкеяк чувтыне, ёртнемс шукшпрят. Озксонь ютавтома шкасто эрьвась мартонзо кандыль эсензэ эрямо таркасто мода, почодылизь вейсэнь мааронть лангс. Ламо пингень перть те маарось покшолгадыль, кепетиль верев. Те кортыль седе, эрзянь раськесь эзь ёма, сон эри ды касы-покшолгады. 
    Эрзянь кезэрень те коесь эрясь 1629 иенть самс. Мейле рузонь инязоронть мереманзо коряс лоткавтозель. Ды ансяк 370 иень ютазь сон таго вельмевтезель. Те тевсэнть весемеде покш путовкс тейсть Кшуманцянь Пиргуж (Г.Д.Мусалев), Маризь Кемаль (Р.С.Кемайкина), Йовлань Оло (В.И.Ромашкин) ды лият. 2004 иестэ Раськень озксось, кода мокшонь «Акша келусь», татаронь «Сабантуесь», рузонь «День славянской письменности и культуры» Мордовиянь се шкань прявтонть Н.И.Меркушкинэнь указонзо коряс яволявтозельть государственной покшчикс. Лиякс мерезь, сынь ютавтневить республикань бюджетстэ ярмак лангс. 
    А кода а тешкстамс, тедедень Раськень озксось ютавтозель «Культура» национальной проектэнть лувсо Российской Федерациянь Культурань министерстванть ды Мордовия Республикань Культурань, национальной политикань ды архивной тевень министерстванть лездамост пингстэ. Сон сови «Территория традиций» («Кой юрт») Регионъютконь этнокультурной транзитэнь мероприятиятнень юткс. Текень кувалма, паряк, полавтозель покшчинть ютамо лувоськак. Сон седе келейгавтозель ды одкстомтозель. Те неявсь тарканть чачонзо коряскак. Сон седе мазылгавтнезель. Эрьва кува стявтнезельть кирекс тапардазь тикшень штеметь. Аравтнезельть эйкакштнень туртов налксема батутт, нурсемат. Башка таркасо – казнень-налкшкень микшнема латынеть. Лия ёно – стольть-эземть, улезэ козонь озамс ярсамсто. Кинь мелезэ ульнесь седе ламо содамс Раськень озкстонть, сынст учость фотоквестэсь (тонадодо истят валтнэс), «Фито-бар» литературной кужось. 
    Морыцятнень-киштицятнень туртов ладязельть натой кавто сценат: покш ды вишкине. Вишкиненть лангсо инжетнень вастсь Игнатбуень «Пизелнэ» морокурось. Покшось теезель концертэнь ютавтомс. Те карми мейле. Васня весе ломантне пурнавсть мааронть перька, конань лангс стявтозель Пазонь Штатолось. Ушодовсь покшчинь прявт коесь – Озксось. Гайгстась торамась, ды Штатолонть икелев шумбра кши ды тантей медь марто лиссть Озатясь ды Озавась. «Тюштя» морось, конань серьгедизь Йовлань Оло лемсэ «Торама» ансамблясо морыцятне, таго весенень ледстизе се шканть, зярдо минек раськесь печтясь покштояк покш стакачить. 
    Раськень Штатолонть валдонзо ало 
    Кирвазтезель Раськень Штатолось. Тень теизе Ёгань Минька (М.Четвергов). Сон эри Красноярскойсэ. Тень лангс апак вано, эзинзе сезе сюлмавкстнэнь чачома таркатнень марто. Озноманть ютавтомадо мейле весень икелев кармасть лиснеме мокшэрзянь театрань артисттнэ эрзянь ине ломантнень чачосо: Тюштя, Пургаз, Разгильдяев Баюш, Эрзямасонь Олёна, Боляень Акай, Василень Несмеян, Алексеень Кузьма, превсодыйтне М.Е.Евсевьев, А.П.Рябов, Степан Эрьзя, Серафима Люлякина, Дмитрий Надькин, Йовлань Оло. Эрьвась тердсь эрзятнень а ёмавтомс тиринь келенть, а пачтямс куломас эрзянь раськенть. 
    Мааронть одкстомтомга сонзэ перька ютавтозель сокас кильдезь алаша ды почодозель од мода, конань мартост кандсть весе, кить састь озксов. Теде мейле пурнавозтне, кедте-кедьс кундазь, тейсть покш кирькс, мезесь корты минек раськенть а явовомадо, пельксэнь-пелькс а сезневемадо. Ютавтозель Атянь эзем, косо кортамось таго мольсь минек раськенть уцяскадо. Кшуманцянь Пиргуж каизе Инязоронь лемензэ, сонзэ таркас ней А. Болькин. Украинасо эрязь, кода карми ветямо Инязоронь тевтнень, эряви кевкстемс эсензэ Болькинэнь. 
    Эрзянь раськентень – эрямс! 
    Морамо кужонть ушодовомадо икеле – поздоровт, казнеть. Валось васняяк максозель Мордовия Республикань Госсобраниянь Председателень полавтыцянтень И.М.Москаевнень. Иван Михайлович, кода свал, эрзякс ёвтась лембе ды превей валт, тердинзе весень седе тов ванстомс эсь койтнень. Сонзэ поладызь МР-нь Культурань, национальной политикань ды архивень тевень министрась А.М.Чушкин, Регионъютконь мокшонь, эрзянь раськень вейсэндявксонь прявтось Ю.А.Мишанин, Игнатбуень прявтось Т.Н.Полозова ды лият. 
    Покш мельспаросо ютась «Руця» эрзянь оршамонь пелькстамось. Сонзэ эйсэ эсест кедьсэ стазь оршамост невтнесть покштнеяк, вишкинетнеяк. Васенце таркась максозель Володинтнэнь кудораськентень. Сынь сакшность весе. Эйстэст кемгавтовошкальть ды весе оршазельть эсест кедьсэ стазь-викшнезь оршамосо. 
    Морамо кужонть ушодызе МР-нь народной артисткась Нина Спиркина. Эсест киштемасо ваныцятнень верест седеяк псилгавтызь «Арсема» ансамблясо киштицятне. Вейке омбоце мельга кармасть лиснеме лия морыцятне. Сынь састь кода Мордовиясто, истя Россиянь васоло таркатнестэяк: Московсто, Саратовасто, Самарасто, Пензасто, Болдинасто, Марий Элстэ, Удмуртиясто. Ульнесть морыцят натой Эстэнь ды Суоминь мастортнэстэ. Пек мельспароль тень таго вастовомс Джек Рютер марто. Сон чачсь Америкасо. Тев эстензэ кочкась – содамс ламо кельть. Парсте тонавтнизе эрзянь келентькак. Урьвакстсь эрзянь тейтерь лангс. Ней сынь кавто эйкакшост марто эрить Хельсинкисэ. 
    Те весе корты вейкеде: Раськень Озксонть содасызь модамасторонть келес. Понгомс сонзэ лангс бажить пек ламо ломанть. Лисни, минек раськесь эзизе ёмавто эсь тарканзо масторлангсо уликс раськетнень ютксо. Каднови кемемс, те тарканть эрзятне кармить ванстомо пингеде-пингес! 

    Раиса Щанкина

     

    17.07.2019 / Количество просмотров: 56