• Главная
  • Артисты
  • Люди театра
  • История
  • Билеты
  • Пресса
  • Гостевая книга
  • Контакты
  • Министерство культуры, национальной политики, туризма и архивного дела Республики Мордовия 2019 ГОД - ГОД ТЕАТРА В РОССИИ
    Касса театра: 38-07-03
    Администраторы: 47-25-33
    Репертуар Афиша ПРОЕКТЫ Наши достижения НАЦИОНАЛЬНЫЙ ПРОЕКТ "КУЛЬТУРА"" Оценка качества условий оказания услуг Документы Программа для туристов

    Мордовиянь заслуженной артисттнэ вастневсть ваныцятнень марто

    Эрзянь ды мокшонь национальной драматической театрасо ютась «О несерьёзном с серьёзными людьми» лементь ало мельстуиця вастовома. Тесэ театрань заслуженной вете артисттнэ Марина Аверкина, Галина Самаркина, Нина Абросимова, Тимофей Чудаев ды Алексей Егранов вастневсть ваныцятнень марто. Весе мольсь ток-шоу лувсо пейдема марто. 

    Чокшнень ветицятне П.Михайлов, В.Стороженко ды М.Акимов киньгак эзть кадо нусмакалеме, пейдевтсть апак лотксе. Заслуженной артисттнэнь озавтызь Вишка залонь сцена лангс, сынст туртов макснесть кевкстемат ды арсесть салавань заданият. Васняяк артисттнэ ёвтнесть, кода кочкизь актёронь профессиянть. Малав весе эйстэст эйкакшпингстэ саезь ды школасо тонавтнемстэ невтсть пряст сцена лангсо: ловность стихть, морасть, налксесть сценкасо. 

    М.Аверкина ды Г.Самаркина школань прядомадо мейле тонавтнесть Московонь Щепкинэнь лемсэ театрань училищасо. Вейкесь чачсь Ташто Шайгова ёнкссо, омбоцесь – Дубёнкань районсо. Студентэнь шкатнестэ саезь ды течис сынь паро ялгат. Н.Абросимова тонавтнесь Казанень культурань институтсо, сонзэ прядомадо мейле тердизь важодеме минек театрав. 

    Домкасто эсь прядонзо пачтясь Т.Чудаев. Сон чачсь васоло Сахалинсэ, мейле эрясь Оренбург ёнкссо. Зярдояк эзь арсе улемс артистэкс, ансяк те профессиясь, валонзо коряс, теке мерят якась мельганзо. Сон колмо иеть якась киштемань кружоков, велень хозяйствань училищасо тонавтнемстэ агитбригада марто ардтнизе весе Оренбург ёнксонть, армиясо служамсто ладизь клубонь прявтокс. 

    Эрьванть ламо ролензэ. Сынст важодемаст аволь весть тешкстазь театрань фестивальтнесэ, МР-нь Прявтонь премиясо. 

    Актёртнэнень энялдсть ёвтнемс тамашань ды пейдемань тевтнеде, конат лиснесть мартост. Сынь видькстасть, келя, сындест ламо. Шкась таргави валскес. Ледстизь, кода Покш Игнатбуесэ гастрольсэ улемстэ вейке актёронть кемензэ чавизь эсксэ! Сон тонгинзе ды а сыргави таркастонзо. Мейле путынзе весе виензэ ды… сыргась кемтнесэ кияксонь лазтнэнь марто, теке кавто сокссо! Эштё вейкенень кескавс путнесть кирпецть. Актёртнэ мерсть, весе згилямотне ульнесть чевтть, аволь кежейть, кияк киньгак лангс эзь покордаво. 

    Седе тов минек геройтне ловность эсест кодамояк монолог, ансяк задания марто: саемга, ловномс сельведь марто пейдезь, кургонь автезь, иредьстэ, тандадозь, кельмезь, кода футболонь комментатор ды седе тов. Баягинень гайгемань коряс эрявсь седе курок полавтомс ёжотнень. Зяро пейдемат ды цяпамот ульнесть! 

    Теде мейле яволявтозель лия кармавтома: эрявсь кортамс фильмань геройтнень таркас, арсемс сынст валост таркас эсест валт ды тема. Артисттнэ тесэяк эзть талакадо, сеске мусть мезе кортамс. 

    Ветицятне ютавтсть инжетнень-ваныцятнень мартояк налксема. Экрансо невтезь фотографиятнень коряс эрявсь содамс, кодамо спектакля тосо невтеви. Малав весе содызь. Изницятненень явшесть спектаклянь ваномань сертификатт. 

    Вастовоманть песэ актёртнэнь туртов ульнесть казнеть – сынст фотографияст теизь шаржонь артовкссо! Неть важодематне тусть весень мельс. 
    Театрасо чокшнесь ливтязь ливтясь. Весе кадовсть покш мельспаросо. Вечкевикс артисттнэ явшесть автографт, сынст марто тейнесть фотографият, мейле весе вейсэ симсть тантей чайде, кияк эзь капша туемс кудов. Ваныцятне ёвтасть ламо сюкпрянь валт ды энялдсть поладомс неть лембе вастовоматнень. 

    Т.Маторкина 
    фототне Нацтеатрань

               

    07.03.2019 / Количество просмотров: 24