• Главная
  • Артисты
  • Люди театра
  • История
  • Билеты
  • Пресса
  • Гостевая книга
  • Контакты
  • Министерство культуры, национальной политики, туризма и архивного дела Республики Мордовия
    Касса театра: 38-07-03
    Администраторы: 47-25-33
    Репертуар Афиша План работы Наши достижения ЮБИЛЕЙНЫЕ ДАТЫ Оценка качества Документы Программа для туристов

    Нацтеатрась пекстызе сезононзо од премьерасо

    Маень 11-це чистэ Эрзя-мокшонь национальной театрасо пекставсь сезонось. Коень коряс, театрась анокстась алкуксонь кенярксчи ды тердинзе ваныцятнень шкадо икеле. «Морденс» ды «Мерема» ансамблятне морасть тиринь кельсэ морот. Сынст маласо аштесть А.С.Пушкин, Арина Родионовна, конатнень марто меревсь снимсемс. Тесэ истя жо панжовсть кедьчелькев ломантнень выставкат. Инжетнень каванясть поза марто пачалкседе.

    Мейле весе пурнавозтненень пшкадсь нацтеатрань прявтось С.И.Дорогайкина. Сон ёвтась сюкпря ваныцятненень, конат вечксызь театранть, сакшныть ваномо эрьва путовксонть, ёвтыть мелест-арсемаст спектаклятнень коряс. Истя жо сюконясь актёртнэнень паро важодемаст кисэ. Благодарностьсэ казевсть СМИ-нь важодицятне, конатне пачтить театрадонть, ды свалшкань ваныцятне.

    Теде башка, ютась А.Пушкинэнь «Капитанская дочка» драманть коряс спектаклянь премьера. Сонзэ путыцязо – Марий Элэнь искусствань заслуженной деятелесь, Государственной премиянь лауреатось В.А.Пектеев. Мокшонь кельс произведениянть ютавтызе МР-нь народной писателесь В.И.Мишанина. Театрась Пушкинэнь путы васенцеде.

    Прявт геройтнень налксесть Евгений Благов (Пётр Гринёвонь) ды Екатерина Исайчева (Маша Мироновань). Кавто од ломантнень ютксо кирвазиця вечкемась невтезель парсте! Эряви шнамс Анатолий Нуштайкинэнь (Савельичень) налксеманзо. Сон аволь прявт герой, ансяк истя мазылгавтызе путовксонть! Гринёвонь тетянть налксесь Александр Батырев, те од артистэсь натой эзь содавояк тенек. Кода сон полавтовсь, прок алкукс пушкинэнь шкасто лиссь. Спектаклясонть истя жо налксесть Марина Аверкина (Василиса Егоровна), Андрей Кипайкин (Иван Кузьмич Миронов), Дмитрий Мишечкин (Швабрин) ды лият. Те ульнесь премьера, конань одс минь несынек ансяк сёксня.

    Иень перть театрась ютавтсь «Сехте вадря артист» пелькстамо. Спектаклянь ваномадо мейле эрьвантень меревсь кочкамс сехте вадря актёронть. Театрань фойесэ ладязель паргине, ков каявсь мельстуиця актёронть лемезэ. Ней яволявтовсть итогтне. Изницякс таго лиссь МР-нь заслуженной артистэсь Алексей Егранов, кона налкси малав эрьва спектаклясо. Налксемазо талновты ваныцянть, токи седейс, маряви, сонензэ невтеви эрьва кодамо образ, парсте машты невтеме обуцят. «Капитанская дочка» путовкссонть Алексей налксизе Емельян Пугачёвонь роленть. Ваныцятне цяпасть актёронтень седейшкава! Тешкставсть лия артисттнэяк, кинь кис макссть ламо вайгельть.

    Театрась полады важодеманзо. Од сезонсто сынь бажить путомс В.Мишанинань ды М.Горькоень коряс путовкст. Минь, ваныцятне, карматано учомо од премьерат.

     Т.Маторкина

                

     

    16.05.2018 / Количество просмотров: 22