• Главная
  • Артисты
  • Люди театра
  • История
  • Билеты
  • Пресса
  • Гостевая книга
  • Контакты
  • Министерство культуры, национальной политики, туризма и архивного дела Республики Мордовия
    Касса театра: 38-07-03
    Администраторы: 47-25-33
    Репертуар Афиша План работы Наши достижения ЮБИЛЕЙНЫЕ ДАТЫ Оценка качества Документы Программа для туристов

    ЭРЬВА РОЛЕНТЕНЬ ПУТОМА ОЙМЕ, ВИЙТЬ, МЕЛЬ…

    МР-нь Заслуженной артисткась Марина Аверкина малав колоньгемень иеть важоди Эрзянь ды мокшонь раськень драмань театрасо. Те шканть перть налксезь ламо рольть, невтезельть эрьва кодат образт. Сынь кадовсть ваныцятнень мельс, талновтсть эйсэст ды кецявтсть. Минь вастовинек актрисанть марто ды седейшкава кортынек. Течинь номерсэ содавттадызь тынк те превей, мазый, эрямонь вечкиця аванть марто. 

    Марина Петровна чачсь Ташто Шайгова велесэ. Ансяк весе ундоксонзо – эрзянь. Тетязо ды авазо – Покш Березникень райононь Симкинасто ды Парынзэлестэ. Мейле важодемань коряс одтнэ кучозельть Ташто Шайговав. Маринань авазо, Валентина Леонтьевна, малав 40 иеть важодсь школасо тонавтыцякс. Сонзэ кинть кочкизе тейтерезэяк, кона прядызе школанзо медаль марто. 

    Те шкане республиканть пельде Московов тонавтнеме пурнасть эрзянь ды мокшонь актёронь студия. Ташто Шайговав сакшность актёрт, конат ёвтнесть театрадо ды тердсть молемс тонавтнеме. Сынь ардтнесть весе районтнэва ды вешнесть ёроков эйкакшт. Мейле Московсто састь педагогт ды кочкасть эстест кемнилее ломанть. Марина пек кецнесь, зярдо яволявтсть сонзэ саемадо. Сон вешинзе минек университетстэ документэнзэ ды тусь Московов, косо 1985 иестэ саезь 1989 иес тонавтнесь М.С.Щепкинэнь лемсэ высшей театральной училищасо. 

    – Мартон тонавтнесть минек театрань актрисатне: Г.Самаркина, В.Ермошкина, И.Алексеева (ней уш арась ютксонок), истя жо Ю.Учватова, С.Адушкин ды лият. Минь те шкас паро ялгат. Кадык юткстонок эзть тееве семият, минь карминек паро ялгакс, теке роднят-раськеть, – ёвтни Марина Петровна. 

    – Марина Петровна, стака ульнесь тонавтнемс Московсо? 

    – Тонавтнемась марявсь шождакс. А вана тонадомс Московонь эрямонтень – те лия тевесь. Ёвтавлинь паро валт педагогтнеде. Сынь невтизь тенек Московонть, Санкт-Петербургонть, сайнесть эйсэнек экскурсияв. Башка валт ёвтавлинь Владимир Прохорович Селезневдо. Ламо мезес тонавтсь минек. Эсензэ ярмак лангс рамсесь тенек театрав билетт. Невтинзе весе сехте вадря ды виев спектаклятнень. Сайнимизь содавикс Ленкомов, Покш театрав, ков стака ульнесь понгомс. Лия театратнес нолдасть студентэнь билетэнь коряс. Тонавтнемась тень вечкевсь. Тосо ульнесть сехте мельстуиця предметтнэ – рузонь кель, рузонь ды омбо масторонь литература, рузонь ды лия масторонь театратнень история. Теде башка, ульнесь фехтования, киштема, морамо. Тонавтнинек валскестэ саезь чокшнес. Парсте кортамонь коряс тонавтсть эйсэнек учебникень автортнэ. Тонавтыцянок зярдояк эзть покорда, свал бажасть лездамс. 

    Тонавтнеманть прядомадо мейле эрзя-мокшонь курсось велявтсь Мордовияв. Тесэ сынст туртов панжовсь национальной театрась. Кода панжовсь? Тагояк ламо лездась В.П.Селезнев тонавтыцясь. Сон важодсь се шкане культурань коряс прявтокс. Макссть здания (ней те мокшэрзянь раськень культурань музей), косо ульнесть чаво стенат, эрявсь теемс витнема-петнема. Од актёртнэ сынсь витнизь-артызь театранть, сценанть теизь подвалсо. Чинек-венек од ломантне ютавтсть репетицият. Кецямось ульнесь а ёвтавияк кодамо. Макссть тенст квартират. 

    – Марина Петровна, ледстнетядо, кодамо васенце спектаклянк? 

    – Васенце спектаклясь, конань путынек, – А.Пудинэнь «Анахореты, или Угол для сирот». Путыцязо – В.Г.Черменев, сон сась мартонок Московсто. Пек паро режиссёр, минь сонзэ туртов теке тиринь эйкакшт ульнинек. Сон пек мазылгавтызе спектаклянть, пештизе раськень ёжодо. Теде башка, тешкставлия В.И.Ромашкинэнь. Музыкальной пельксэнть лангсо аштесь сон. Кода содатано, Ромашкин ламо ардтнесь веле-веле ланга ды пурнась кезэрень морот. Сон усксь мартонзо бабинат, косо сёрмадозельть сырькайтнень пельде моротне. Вайгеленек ладинзе 4-5 вайгельс. Минек весе курсонок морыцяль. Монь койсэ, те спектаклясь – минек раськенть оймезэ. Зяро ульнесть сонзэ невтемадо мейле паро мельть-арсемат! 

    – Нацтеатрасо Тынь налксетядо ламо спектаклясо. Кодамо ролесь Тенк малавикс, пек тукшны мелезэнк? 

    – Весе ролень вечксынь. Ламотне эйстэст истят, косо эряви невтемс виев, кеме обуця, невтемс эрьва кодат ёжомарямот, талновтомс ваныцянть. Саемга, Э.Портерэнь «Уроки радости» путовкссонть налксян тейтерненть кежейдеяк кежей патянзо. Эрявсь невтемс минек ютксо контрастонть. Мельс тукшны А.Галинэнь «Ретросо» Роза Александровнань, сыре актрисанть, ролесь. Умок путнинек В.Мишанинань «Кепе менельга» спектаклянть, пек паро пьесась, тосо невтеви социальной конфликт, ролем истя жо мельстуиця. Эрьва ролентень эряви путомс ойме, вийть, мель. Зярдо тонь ули важодемань ды эрямонь покш опытэть – мезеяк стакакс а маряви. Мекевлангт, ули мель варчамс эсь прянть те эли тона рольсэнть. Нама, аволь шожда налксемс трагической, отрицательной рольть. Саемга, минек репертуарсо ули Л.Толстоень «Власть тьмы» эрзянь кельсэ паро путовкс. Тосо эйкакшонь чавома… Сонзэ налксемадо мейле эряви зярыя шка оймсемс, самс ёжос, пурнамс вийть. Мон налксян зярыя моноспектаклясо, косо ансяк кавто-колмо актёрт. Малав кавто часонь перть эряви улемс эсь героенть потсо, ютавтомс весе ойменть пачка. 

    – Марина Петровна, арась меленк тонавтомс актёронь ёрокчинтень од ломантнень? 

    – Иетне ютыть, ды истямо мель сакшны. Ули мезес тонавтомс. Спектаклясо свал улезэ события ды действия. Ваныцятнень талновтыть аволь сельведть ды ризнэмат. Бути моли действия – залось прок а лексияк, ломантне весе мельспаросо ваныть. 

    Аволь умок ардтнинек гастроль марто Татарстанонь Альметьевск ошов. Тосо пек лембестэ вастызь К.Абрамовонь «Эрьванть эсензэ ормазо» путовксонть. Малав эрьва сценадонть мейле ульнесть виев цяпамот. Минек театрась путы те спектаклянть колмоцеде. Ды ломантне свал мельспаросо эйсэнзэ ваныть. Сыненст вечкеви велень тематикась. 

    Монь койсэ, бути путови спектакля эрзянь эли мокшонь кельсэ – сонзэ весенень эряви ваномс. Кадык сыть школатнестэ, ускить ваныцят районсто. Келенек ёмамо лангсо. Ансяк минек ломантнень стака сыргавтомс таркастост… Ней ломантне лиякс ваныть театранть лангс. Сыненст сон эряви. Театрась свал карми эрявомо. Театрась – ине тев, конадонть ваныцятне пурныть вийть, полавтови ёжост. Ломантненень а сатны те валдо энергиясь. Театрась – вейке покш коллектив, косо моли вейсэнь важодема. Ламось ашти режиссёронть эйстэ. Аволь шожда теемс-кемекстамс репертуаронть, улезэ сон эрявикс ды вешевикс. Сюкпря Пазонтень, минек коллективесь паро, эрьва тевсэ свал лездатано вейке-вейкенек туртов. 

    Марина Аверкина налкси малав ведьгемень спектаклясо, кода покшонь, истя жо эйкакшонь путовкссо. Казезь ламо Благодарностьсэ ды Почетной грамотасо. 2006 иестэ сонензэ максозь «МР-нь Заслуженной артист» лемесь. Свал мельспаросо сакшныть ваномо спектаклянзо малавиксэнзэ: Валерий Александрович мирдезэ, Настя тейтерезэ, Никита цёразо (тонавтни 5-це классо). Настянь кисэ авазо ашти каштанчисэ, сон прядызе Гнесинтнэнь лемсэ Россиянь музыкань академиянть. 
    Аволь умок Марина Петровна тешкстызе юбилеензэ. Арсетяно тензэ кеме шумбрачи, паро уцяска, вадря ды мельстуиця рольть, семиясо – сэтьме эрямо! 

    Т.МАТОРКИНА

      

    16.05.2018 / Количество просмотров: 21